ലോകത്തെ ഏറ്റവും സ്വാധീനമുള്ള 100 വ്യക്തികളുടെ വാർഷിക പട്ടിക ടൈം മാഗസിൻ പുറത്തുവിട്ടു. വ്യവസായ പ്രമുഖൻ ഗൗതം അദാനി,സുപ്രീം കോടതി അഭിഭാഷക കരുണ നുണ്ടി, പ്രമുഖ കശ്മീരി മനുഷ്യാവകാശ പ്രവർത്തകൻ ഖുറം പർവേസ് എന്നിവർ പട്ടികയിൽ സ്ഥാനം നേടി. യുക്രൈൻ പ്രസിഡന്റ് വോളോഡിമർ സെലെൻസ്കി, മിഷേൽ ഒബാമ, ആപ്പിൾ സിഇഒ ടിം കുക്ക് എന്നിവരും TIME 100 പട്ടികയിൽ ഉൾപ്പെടുന്നു. യുഎസ് പ്രസിഡന്റ് ജോ ബൈഡനെ കൂടാതെ, കെവിൻ മക്കാർത്തി, റോൺ ഡിസാന്റിസ്, കിർസ്റ്റൺ സിനിമ, കേതൻജി ബ്രൗൺ ജാക്സൺ എന്നിവരാണ് പട്ടികയിലെ അമേരിക്കൻ രാഷ്ട്രീയ നേതാക്കൾ.പട്ടികയിലെ ഏറ്റവും പ്രായം കുറഞ്ഞ വ്യക്തി 18 വയസ്സുള്ള എലീൻ ഗുവാണ്. ഏറ്റവും പ്രായമുള്ള വ്യക്തി 91 വയസ്സുള്ള ഫെയ്ത്ത് റിംഗ്ഗോൾഡറും.
ടൈറ്റൻസ് വിഭാഗത്തിലാണ് ഗൗതം അദാനി ഇടം പിടിച്ചത്. അദാനി പൊതുജനങ്ങളിൽ നിന്ന് മാറി, നിശബ്ദമായി തന്റെ സാമ്രാജ്യം കെട്ടിപ്പടുക്കുകയാണെന്നും പരാമർശമുണ്ട്. മാറ്റത്തിനായി കോടതിമുറിക്ക് അകത്തും പുറത്തും ശബ്ദം ഉയർത്തുന്ന പൊതുപ്രവർത്തകയാണ് കരുണ നുണ്ടി. ബലാത്സംഗ നിയമങ്ങളുടെ പരിഷ്കരണത്തിനായി വാദിക്കുകയും ജോലിസ്ഥലത്തെ ലൈംഗിക പീഡനവുമായി ബന്ധപ്പെട്ട കേസുകളിൽ പോരാടുകയും ചെയുന്ന ചാമ്പ്യനാണ് നുണ്ടിയെന്ന് മാഗസിന്റെ അഭിപ്രായം.
കാശ്മീർ മേഖലയിലെ മനുഷ്യാവകാശ ലംഘനങ്ങൾക്കും അനീതികൾക്കുമെതിരായ ഖുറം പർവേസിൻ്റെ തീവ്ര പോരാട്ടത്തിൻ്റെ ശബ്ദം ലോകമെമ്പാടും മുഴങ്ങി. എന്നാൽ പർവേസിൻ്റെ ശബ്ദം അടിച്ചമർത്തിയെന്നും ടൈം മാഗസിൻ ലേഖനത്തിൽ പറയുന്നു.
Comments