40 നെതിരെ 87 വോട്ടുകള്‍ക്ക് ആണ് പ്രമേയം പരാജയപ്പെട്ടത്
തിരുവനന്തപുരം: സംസ്ഥാന സര്‍ക്കാരിനെതിരെ പ്രതിപക്ഷം കൊണ്ടുവന്ന അവിശ്വാസ പ്രമേയം പരാജയപ്പെട്ടു. 40 നെതിരെ 87 വോട്ടുകള്‍ക്ക് ആണ് പ്രമേയം പരാജയപ്പെട്ടത്. സഭ അനിശ്ചിതകാലത്തേക്ക് പിരിഞ്ഞു.
40 എംഎല്‍എമാര്‍ അവിശ്വാസ പ്രമേയത്തെ അനുകൂലിച്ചപ്പോള്‍ 87 പേര്‍ എതിര്‍ത്തു. മൂന്ന് പേര്‍ വിട്ടു നിന്നു. അവിശ്വാസ പ്രമേയ വോട്ടെടുപ്പോടെ സഭ അനിശ്ചിത കാലത്തേക്ക് പിരിഞ്ഞതായി സ്പീക്കര്‍ പി.ശ്രീരാമകൃഷ്ണന്‍ അറിയിച്ചു.
കോവിഡിന്‍റെ പശ്ചാത്തലത്തില്‍ അനുകൂലിക്കുന്നവരുടേയും പ്രതികൂലിക്കുന്നവരുടേയും എണ്ണം തിട്ടപ്പെടുത്തിയത് എഴുന്നേറ്റുനിര്‍ത്തിയാണ്. യുഡിഎഫിനു പുറത്തു നില്‍ക്കുന്ന ജോസ് കെ.മാണി പക്ഷം വോട്ടെടുപ്പില്‍ നിന്നു വിട്ടു നിന്നു. ജോസ് പക്ഷത്തുനിന്നുള്ള റോഷി അഗസ്റ്റിനും ഡോ. എന്‍ ജയരാജും നിയമസഭയില്‍ എത്തിയിരുന്നില്ല. ഇരുവരും നിയമസഭാ കോംപ്ലക്സിലുള്ള എംഎല്‍എ ഹോസ്റ്റലില്‍ തന്നെയുണ്ടായിരുന്നു.
ജോസഫ് വിഭാഗത്തിലെ പി.ജെ. ജോസഫും മോന്‍സ് ജോസഫും സഭയിലെത്തിയപ്പോള്‍ മറ്റൊരംഗമായ സി.എഫ്. തോമസ് ശാരീരിക അസ്വസ്ഥതയെ തുടര്‍ന്ന് എത്തിയില്ല.
11 മണിക്കൂറിലേറെ നീണ്ടു നിന്നു അവിശ്വാസ പ്രമേയ ചര്‍ച്ച. മുഖ്യമന്ത്രി പിണറായി വിജയന്റെ മറുപടി പ്രസംഗം 3.45 മണിക്കൂര്‍ നീണ്ടുനിന്നു. കേരള നിയമസഭാ ചരിത്രത്തിലെ ഏറ്റവും ദൈര്‍ഘ്യമേറിയ പ്രസംഗമാണിത്.
