Top News
ശബരിമല പ്രശ്നം തീര്‍ക്കാന്‍ ഇടതുമുന്നണിക്ക് ആഗ്രഹമില്ല; രൂക്ഷവിമര്‍ശനവുമായി ഉമ്മന്‍ ചാണ്ടി
ഭക്തരെ സര്‍ക്കാര്‍ വെല്ലുവിളിച്ചതാണ് പ്രശ്നങ്ങള്‍ക്ക് കാരണമായതെന്നും ഉമ്മന്‍ചാണ്ടി ആരോപിച്ചു
കാസര്‍കോഡ്: സംസ്ഥാന സര്‍ക്കാരിനെതിരെ ശബരിമല വിഷയം ഉയര്‍ത്തി മുന്‍ മുഖ്യമന്ത്രി ഉമ്മന്‍ ചാണ്ടി. ശബരിമല പ്രശ്നം തീര്‍ക്കാന്‍ ഇടതുമുന്നണി ആഗ്രഹിക്കുന്നില്ലെന്നും ഭക്തരെ സര്‍ക്കാര്‍ വെല്ലുവിളിച്ചതാണ് പ്രശ്നങ്ങള്‍ക്ക് കാരണമായതെന്നും ഉമ്മന്‍ചാണ്ടി ആരോപിച്ചു. പ്രതിപക്ഷ നേതാവ് രമേശ് ചെന്നിത്തല നയിക്കുന്ന ഐശ്വര്യ കേരള യാത്ര ഫ്‌ളാഗ് ഓഫ്‌ ചെയ്തുകൊണ്ടാണ് ഉമ്മന്‍ ചാണ്ടി ഇക്കാര്യം പറഞ്ഞത്.
ഭക്തരുടെ ആശയാഭിലാഷങ്ങള്‍ പരിഗണിക്കാതെ യുഡിഎഫ് കോടതിയില്‍ സമര്‍പ്പിച്ച സത്യവാങ്മൂലം പിന്‍വലിച്ച്‌ പാര്‍ട്ടി തീരുമാനമാണ് കോടതിയെ അറിയിച്ചത്. ഉത്തരവ് നടപ്പാക്കാന്‍ സര്‍ക്കാര്‍ തിടുക്കവും ആവേശവും കാട്ടിയെന്നും ഉമ്മന്‍ ചാണ്ടി ആരോപിച്ചു.
യുഡിഎഫിന്‍റെ ഭരണകാലം വികസനത്തിന്‍റെയും കരുതലിന്‍റെയുമായിരുന്നെങ്കില്‍ ഇടത് ഭരണം അക്രമരാഷ്ട്രീയത്തിന്‍റെയും കൊലപാതകത്തിന്‍റേയും വെറുപ്പിന്‍റെയും കാലമായിരുന്നു. വലിയ വികസനം നടത്തിയെന്ന സര്‍ക്കാര്‍ വാദം സത്യമല്ല നാടിനോ ജനങ്ങള്‍ക്കോ ഒരു പ്രയോജനമുണ്ടായില്ല. കേരളത്തിന്‍റെ കഴിഞ്ഞ അഞ്ചുവര്‍ഷം പാഴായെന്നും അദ്ദേഹം പറഞ്ഞു.
ഇടതുമുന്നണിയുടെ അഞ്ച് വര്‍ഷത്തെ ഭരണം കേരളം മടുത്തിരിക്കുന്നുവെന്നും ഇപ്പോഴത്തെ മുഖ്യമന്ത്രി പിണറായി വിജയന് ഇനിയും ഒരു രണ്ടാമൂഴം നല്‍കാന്‍ കഴിയില്ല എന്ന് കേരള സമൂഹം പ്രഖ്യാപിക്കേണ്ട സന്ദര്‍ഭമാണിതെന്നും രമേശ് ചെന്നിത്തല യാത്രയുമായി ബന്ധപ്പെട്ടുള്ള തന്റെ പ്രസംഗത്തില്‍ പറഞ്ഞു.
സിപിഎമ്മിനെതിരെ മുല്ലപ്പള്ളി രാമചന്ദ്രനും രംഗത്ത് വന്നിരുന്നു. പാര്‍ട്ടി ഉയര്‍ത്തുന്നത് വിഷം ചീറ്റുന്ന വര്‍ഗീയതയാണെന്നും ഭൂരിപക്ഷ വര്‍ഗീയതയെ പ്രീണിപ്പിക്കുന്ന നയമാണ് അവരുടേതെന്നുമുള്ള പ്രസ്താവനയാണ് അദ്ദേഹം നടത്തിയത്.
സംശുദ്ധം സദ്ഭരണം എന്ന മുദ്രാവാക്യമുയര്‍ത്തി പ്രതിപക്ഷ നേതാവ് രമേശ് ചെന്നിത്തലയാണ് യാത്ര നയിക്കുന്നത്. കെപിസിസി പ്രസിഡന്‍റ് മുല്ലപ്പള്ളി രാമ ചന്ദ്രന്‍, പി.കെ. കുഞ്ഞാലിക്കുട്ടി എംപി, പി.ജെ. ജോസഫ് എംഎല്‍എ, യുഡിഎഫ് കണ്‍വീനര്‍ എം.എം. ഹസന്‍ തുടങ്ങിയവരും കേരള യാത്രയുടെ ഭാഗമാകും.
No stories found.
