ഡാറ്റ ചോര്‍ത്തിയിട്ടില്ല, കമ്മീഷന്‍റെ വെബ്സൈറ്റില്‍ ശേഖരിച്ച വിവരങ്ങളാണ്; മറുപടിയുമായി ചെന്നിത്തല

ആര്‍ക്കും പ്രാപ്യമായ വിവരങ്ങളാണ്. ഇത് ഡൗണ്‍ലോഡ് ചെയ്ത് ക്രോഡീകരിക്കുക മാത്രമാണ് ഓപ്പറേഷന്‍ ട്വിന്‍സില്‍ നടത്തിയിട്ടുള്ളതെന്ന്​ അദ്ദേഹം പറഞ്ഞു
ഡാറ്റ ചോര്‍ത്തിയിട്ടില്ല, കമ്മീഷന്‍റെ വെബ്സൈറ്റില്‍ ശേഖരിച്ച വിവരങ്ങളാണ്;  മറുപടിയുമായി ചെന്നിത്തല

തിരുവനന്തപുരം: വ്യാജ വോട്ട്​ സംഭവത്തില്‍ ഡാറ്റ ചോര്‍ത്തിയെന്ന സി.പി.എം ആരോപണത്തിന്​ മറുപടിയുമായി പ്രതിപക്ഷ നേതാവ്​ രമേശ്​ ചെന്നിത്തല. വോട്ടേഴ്സ് ഐ.ഡിയുമായി ബന്ധപ്പെട്ട വിവരങ്ങള്‍ തെരഞ്ഞെടുപ്പ്​ കമീഷന്‍ വെബ്സൈറ്റില്‍ ശേഖരിച്ച, ആര്‍ക്കും പ്രാപ്യമായ വിവരങ്ങളാണ്. ഇത് ഡൗണ്‍ലോഡ് ചെയ്ത് ക്രോഡീകരിക്കുക മാത്രമാണ് ഓപ്പറേഷന്‍ ട്വിന്‍സില്‍ നടത്തിയിട്ടുള്ളതെന്ന്​ അദ്ദേഹം പറഞ്ഞു.

'തെരഞ്ഞെടുപ്പ്​ പ്രചാരണത്തിന്‍റെ അവസാനഘട്ടത്തില്‍ ഡാറ്റ ചോര്‍ച്ച എന്ന ഗൗരവമേറിയ വിഷയം വീണ്ടും ചര്‍ച്ചക്ക്​ കൊണ്ടുവന്നതിന് സി.പി.എമ്മിനെ നന്ദി അറിയിക്കുന്നു. സി.പി.എമ്മിന്‍റെയും ഇടതുപക്ഷത്തിന്‍റെയും പ്രഖ്യാപിത നയമായിരുന്ന ഡാറ്റ സ്വകാര്യത ലംഘിക്കപ്പെട്ട സ്പ്രിംക്ലര്‍ ഇടപാടില്‍ സര്‍ക്കാറിന്​ വേണ്ടി ഘോരഘോരം വാദിച്ചവര്‍ ഇപ്പോള്‍ ഈ വിഷയം മുന്നോട്ടു കൊണ്ടുവന്നു എന്നത് സ്വാഗതാര്‍ഹമാണ്. എന്നാല്‍, ഏതെല്ലാമാണ് സെന്‍സിറ്റിവ് സ്വകാര്യ ഡാറ്റ, ഏതെല്ലാമാണ് അല്ലാത്തത് എന്നതിനെക്കുറിച്ച്‌ സി.പി.എമ്മിന്‍റെ പ്രഖ്യാപിത ബുദ്ധിജീവികള്‍ക്കു പോലും അറിയാത്തത് കഷ്​ടമാണ്.

സര്‍ക്കാറിന്‍റെ തട്ടിപ്പുകള്‍ പൊടിപൊടിക്കുന്ന കാലത്തൊന്നും ഇവിടെ കാണാതിരുന്ന പോളിറ്റ് ബ്യൂറോ അംഗങ്ങളെ ഇപ്പോള്‍ കാണുന്നതില്‍ സന്തോഷമുണ്ട്. തെരഞ്ഞെടുപ്പു പട്ടികയിലെ വ്യാജ വോട്ടുകളും ഇരട്ടവോട്ടുകളും യു.ഡി.എഫ് കണ്ടെത്തിയത് ദീര്‍ഘമായ പ്രയത്നത്തിനൊടുവിലാണ്. തെരഞ്ഞെടുപ്പ്​ കമീഷന്‍ പ്രസിദ്ധീകരിച്ച, ഇന്‍റനെറ്റില്‍ ലഭ്യമായ, ലോകത്തിന്‍റെ എവിടെ നിന്നും ആര്‍ക്കും പ്രാപ്യമായ വിവരങ്ങള്‍ എടുത്ത് വിവരങ്ങള്‍ അപഗ്രഥനം നടത്തുക മാത്രമാണ് യു.ഡി.എഫ് പ്രവര്‍ത്തകര്‍ ചെയ്തത്. ഇത് വിവര സ്വകാര്യതയിലേക്കുള്ള കടന്നുകയറ്റമാണ് എന്നെല്ലാം പറഞ്ഞു കേള്‍ക്കുന്നത് കൗതുകകരമമാണെന്ന് രമേശ്​ ചെന്നിത്തല പറഞ്ഞു.

No stories found.
Anweshanam അന്വേഷണം
www.anweshanam.com