ഇംഗ്ലണ്ടിനെതിരെ ഇന്ത്യക്ക് 227 റൺസിന്റെ വൻതോൽവി

വ്യക്തമായ ഗെയിം പ്ലാൻ ഇല്ലാതെയാണ് ഇന്ത്യ ഇന്ന് ബാറ്റിങ്ങിന് ഇറങ്ങിയതെന്ന് വ്യക്തമാക്കുന്നതായിരുന്നു ഇന്ത്യയുടെ കളി.
ഇംഗ്ലണ്ടിനെതിരെ ഇന്ത്യക്ക് 227 റൺസിന്റെ വൻതോൽവി

ചെന്നൈ: ഇംഗ്ലണ്ടിനെതിരെ വൻതോൽവി ഏറ്റുവാങ്ങി ഇന്ത്യ. അഞ്ചാംദിനം റെക്കോഡ്​ റൺചേസ്​ തേടിയിറങ്ങിയ ഇന്ത്യ 227 റൺസിന്‍റെ കനത്ത തോൽവി ഏറ്റുവാങ്ങുകയായിരുന്നു. ഇന്ത്യയെ 192 റൺസിന്​ പുറത്താക്കിയ ഇംഗ്ലണ്ട്​ വമ്പൻ വിജയത്തോടെ പര്യടനം ആഘോഷമായിത്തുടങ്ങി. നാലുവിക്കറ്റ്​ വീതമെടുത്ത ​വെറ്ററൻ പേസ്​ ബൗളർ ജെയിംസ്​ ആൻഡേഴ്​സണും സ്​പിന്നർ ജാക്ക്​ ലീഷുമാണ്​ ഇന്ത്യയെ എറിഞ്ഞിട്ടത്​.

വ്യക്തമായ ഗെയിം പ്ലാൻ ഇല്ലാതെയാണ് ഇന്ത്യ ഇന്ന് ബാറ്റിങ്ങിന് ഇറങ്ങിയതെന്ന് വ്യക്തമാക്കുന്നതായിരുന്നു ഇന്ത്യയുടെ കളി. വിജയത്തിനായി ബാറ്റ്​ ചെയ്യണമോ സമനിലക്കായി പൊരുതണമോ എന്നറിയാതെ ബാറ്റ് ചെയ്ത ഇന്ത്യ ഇംഗ്ളണ്ടിന് മുന്നിൽ അടിയറവ് പറഞ്ഞു. 50 റൺസെടുത്ത ശുഭ്​മാൻ ഗില്ലും 72 റൺസെടുത്ത വിരാട്​ കോഹ്​ലിയുമാണ്​ ഇന്ത്യൻനിരയിൽ ചെറുത്തുനിന്നത്​.

ഒരുവിക്കറ്റിന്​ 39 റൺസെന്ന നിലയിൽ അഞ്ചാംദിനം റൺമലകയറാനെത്തിയ ഇന്ത്യക്ക്​ വന്മതിൽ ചേതേശ്വർ പുജാരെയെയാണ് (15)​ ആദ്യം നഷ്​ടമായത്​. അധികം വൈകാതെ ഇന്ത്യൻ സ്​കോർ 92ൽ നിൽക്കേ നന്നായി ബാറ്റുചെയ്​ത ഗില്ലിനെ (50) തകർപ്പൻ ഇൻസ്വിങ്ങറിലൂടെ കുറ്റിതെറിപ്പിച്ച്​ ആൻഡേഴ്​സൺ മടക്കി. അതേ ഓവറിൽ തന്നെ റൺസൊന്നുമെടുക്കാത്ത രഹാനെയയും ആൻഡേഴ്​സൺ ക്ലീൻ ബൗൾഡാക്കിയതോടെ ഇന്ത്യൻ വിധി തീരുമാനമായിരുന്നു.

ഋഷഭ്​ പന്ത്​ (11), വാഷിങ്​ടൺ സുന്ദർ (0), രവിചന്ദ്രൻ അശ്വിൻ (9) എന്നിവരും വൈകാതെ നിരായുധരായി കൂടാരം കയറി. അപ്പോഴും ഒരറ്റത്ത്​ ആത്മവിശ്വാസത്തോടെ ബാറ്റുചെയ്​ത​ കോഹ്​ലി ​ഇന്ത്യക്ക്​ നേരിയ ആശ്വാസം പകർന്നു സ്​കോർ 179ൽ നിൽക്കേ എട്ടാം വിക്കറ്റായി കോഹ്​ലി സ്​റ്റോക്​സിനുമുമ്പിൽ ക്ലീൻ ബൗൾഡായതോടെ ശേഷിച്ചത്​ ചടങ്ങുകൾ മാത്രമായിരുന്നു. ഷഹബാസ്​ നദീം പൂജ്യത്തിനും ജസ്​പ്രീത്​ ബുംറ നാലുറൺസുമെടുത്തും പുറത്തായി.

നാലുമത്സരങ്ങളടങ്ങിയ പരമ്പരയിൽ ഇംഗ്ലണ്ട്​ 1-0ത്തിന്​ മുമ്പിലെത്തി. ഫെബ്രുവരി 13 മുതൽ 17 വരെ ഇതേ സ്​റ്റേഡിയത്തിൽ തന്നെയാണ്​ രണ്ടാം ടെസ്റ്റ്​.

No stories found.
Anweshanam അന്വേഷണം
www.anweshanam.com