മെയ് ഒന്ന് മുതൽ 18 വയസിന് മുകളിലുള്ള എല്ലാവർക്കും വാക്സിൻ നൽകും

സംസ്​ഥാനങ്ങൾക്ക്​ നിശ്ചിത വിലക്ക്​ വാക്സിൻ ഡോസുകൾ നിർമാതാക്കളിൽനിന്ന് വാങ്ങാം
മെയ് ഒന്ന് മുതൽ 18 വയസിന് മുകളിലുള്ള എല്ലാവർക്കും വാക്സിൻ നൽകും

ന്യൂഡൽഹി: മെയ് ഒന്നിന് ആരംഭിക്കുന്ന അടുത്തഘട്ടത്തിൽ 18 വയസ്സിന് മുകളിലുള്ള എല്ലാവർക്കും കോവിഡ്​ വാക്​സിൻ നൽകുമെന്ന്​ കേന്ദ്ര സർക്കാർ അറിയിച്ചു. ആരോഗ്യപ്രവർത്തകർക്കും 45 വയസ്സിന്​ മുകളിലുള്ളവർക്കും മാത്രമാണ് നിലവിൽ വാക്​സിൻ നൽകുന്നത്​. മൂന്നാം ഘട്ടത്തിൽ വാക്​സിൻ വിതരണം കൂടുതൽ ഉദാരവത്​കരിക്കുന്നതിന്‍റെ ഭാഗമായാണ്​ 18 വയസ്സിന്​ മുകളിൽ പ്രായമുള്ള യോഗ്യരായ എല്ലാവർക്കും വാക്​സിൻ നൽകുന്നത്​.

രാജ്യത്ത്​ തിങ്കളാഴ്ച 2.73 ലക്ഷം കോവിഡ്​ കേസുകളാണ്​ സ്​ഥിരീകരിച്ചത്​. കൂടുതൽ വിഭാഗക്കാർക്ക്​ വാക്​സിൻ നൽകുന്നതോടെ കോവിഡിനെതിരായ പോരാട്ടം ശക്​തിപ്പെടുത്താനാകുമെന്നാണ്​​ കേന്ദ്ര സർക്കാറിന്‍റെ പ്രതീക്ഷ. വാക്സിൻ നിർമാതാക്കളോട്​ ഉൽപ്പാദനം വർധിപ്പിക്കാനും 50 ശതമാനം സംസ്ഥാനങ്ങൾക്ക്​ വിതരണം ചെയ്യാനും കേന്ദ്ര സർക്കാർ നിർദേശിക്കുന്നു.

ഇതോടെ സംസ്​ഥാനങ്ങൾക്ക്​ നിശ്ചിത വിലക്ക്​ വാക്സിൻ ഡോസുകൾ നിർമാതാക്കളിൽനിന്ന് വാങ്ങാം. കൂടാതെ സ്വകാര്യ ആശുപത്രികൾ, വ്യാവസായിക സ്ഥാപനങ്ങൾ എന്നിവർക്കും നിർമാതാക്കളിൽനിന്ന് വാക്സിൻ നേരിട്ട്​ വാങ്ങാം. ആരോഗ്യസംരക്ഷണ പ്രവർത്തകർ, കോവിഡ്​ മുൻ‌നിര പ്രവർത്തകർ, 45 വയസ്സിന്​ മുകളിലുള്ളവർ എന്നിവർക്കായി കേന്ദ്ര സർക്കാർ കേന്ദ്രങ്ങളിൽ കുത്തിവെപ്പ്​ സൗജന്യമായി തുടരും. ആദ്യ വാക്​സിൻ എടുത്തവർക്കുള്ള രണ്ടാമത്തെ ഡോസ്​ നൽകുന്നതിലും മുൻ‌ഗണന.

No stories found.
Anweshanam അന്വേഷണം
www.anweshanam.com