തിരുവനന്തപുരം : തിരുവനന്തപുരത്ത് ക്രിട്ടിക്കല് കണ്ടെയ്മെന്റ് സോണുകളില് ഇളവുകള് നല്കാന് തീരുമാനം. കോവിഡ് വ്യാപനം രൂക്ഷമായതിനെ തുടര്ന്ന് ക്രിട്ടിക്കല് കണ്ടെയ്മെന്റ് സോണുകളായി മാറിയ ഇടങ്ങളിലാണ് ഇളവുകള് അനുവദിച്ചത്. ഓഫീസുകള്ക്ക് തുറന്ന് പ്രവര്ത്തിക്കാന് അനുമതി നല്കി. കടകള് 7 മുതല് 4 വരെ പ്രവര്ത്തിക്കും.
തീരദ്ദേശം ക്രിട്ടിക്കല് കണ്ടെയ്മെന്റ് മാറ്റി കണ്ടെയ്മെന്റ് സോണാക്കി. മത്സ്യബന്ധനത്തിന് നിയന്ത്രണങ്ങളോടെ അനുമതി നല്കാനാണ് തീരുമാനം. ക്ലബുകള് ജിമ്മുകള് എന്നിവ തുടര്ന്നു അടഞ്ഞ് തന്നെ കിടക്കും. ഇന്ന് അര്ധരാത്രി മുതല് ഇളവുകള് നിലവില് വരും.
ക്രിട്ടിക്കല് കണ്ടെയ്ന്മെന്റ് പ്രദേശങ്ങളില് കോവിഡ് മാനദണ്ഡങ്ങള് പാലിച്ചും ജില്ലാ കളക്ടറുടെ ഉത്തരവ് അനുസിച്ചും മത്സ്യബന്ധനം നടത്താം. മത്സ്യച്ചന്തകള്ക്ക് പ്രവര്ത്തന അനുമതിയില്ല. എന്നാല് നിയന്ത്രണങ്ങള് പാലിച്ചുകൊണ്ട് അതാത് വാര്ഡുകള്ക്ക് ഉള്ളില് മാത്രം വില്പ്പന നടത്താം. കേന്ദ്ര, സംസ്ഥാന സര്ക്കാര് ഓഫീസുകള്ക്കും മറ്റ് സ്വകാര്യ സ്ഥാപനങ്ങള്ക്കും പരമാവധി 50 ശതമാനം ജീവനക്കാരെ ഉള്ക്കൊള്ളിച്ച് രാവിലെ പത്തുമുതല് വൈകിട്ട് അഞ്ചുവരെ പ്രവര്ത്തിക്കാം. ബാങ്കുകള്ക്കും മറ്റ് സ്വകാര്യ പണമിടപാട് സ്ഥാപനങ്ങള്ക്കും 50 ശതമാനം ജീവനക്കാരെ ഉള്ക്കൊള്ളിച്ച് പ്രവര്ത്തിക്കാം. ഈ സ്ഥാപനങ്ങള് ടോക്കണ് സമ്ബ്രദായം പരമാവധി ഉപയോഗപ്പെടുത്തണം.
അക്ഷയാ കേന്ദ്രങ്ങള്, റേഷന് കടകള് എന്നിവയ്ക്കും പ്രവര്ത്തന അനുമതിയുണ്ട്. ഹോട്ടലുകള്ക്കും റെസ്റ്റോറന്റുകള്ക്കും ടേക്ക് എവേ സംവിവധാനം മാത്രം പ്രവര്ത്തിപ്പിക്കാം. എന്നാല് ചായക്കടകളും ഹോട്ടലില് ഇരുന്നുള്ള ഭക്ഷണവും അനുവദിക്കില്ല.
വിവാഹ, മരണാനന്തര ചടങ്ങുകള്ക്ക് പരമാവധി 20 പേര് മാത്രമേ പങ്കെടുക്കാന് പാടുള്ളു. അടിയന്തര ആവശ്യങ്ങള്ക്കല്ലാതെ ആരുംതന്നെ കണ്ടെയ്ന്മെന്റ് സോണിനു പുറത്തുപോകാന് പാടില്ല. ട്യൂഷന് സെന്ററുകള് ഉള്പ്പടെയുള്ള വിദ്യാഭ്യാസ സ്ഥാപനങ്ങള് പ്രവര്ത്തിക്കാന് പാടില്ല.
ഓഡിറ്റോറിയം, ജിംനേഷ്യം, ക്ലബ്, അസംബ്ലി ഹാള്, സിനിമാ ഹാള്, വിനോദ പാര്ക്കുകള്, തീയേറ്ററുകള്, സ്വിമ്മിംഗ് പൂള്, ബാര്ബര് ഷോപ്പ്, സലൂണ്, ബ്യൂട്ടി പാര്ലര് എന്നിവയും പ്രവര്ത്തിക്കാന് പാടില്ല. എല്ലാ സാമൂഹിക, മത, രാഷ്ട്രീയ, വിനോദ, വിദ്യാഭ്യാസ, കായിക കൂട്ടം ചേരലുകള്ക്കും നിയന്ത്രണമുണ്ട്. രാത്രി ഒന്പതുമുതല് രാവിലെ അഞ്ചുവരെ നൈറ്റ് കര്ഫ്യു തുടരും.