കൊല്ലം: തദ്ദേശഭരണതെരഞ്ഞെടുപ്പിന്‍റെ ആദ്യഘട്ടത്തിൽ രാഷ്ട്രീയപാർട്ടിയുടെ ചിഹ്നമുള്ള മാസ്ക് ധരിച്ചെത്തിയ ഉദ്യോഗസ്ഥയെ സംസ്ഥാന തെരഞ്ഞെടുപ്പ് കമീഷന്‍ ജോലിയില്‍ നിന്ന് സസ്പെന്‍ഡ് ചെയ്തു. കൊല്ലം ജില്ലയിലെ കൊറ്റക്കര ഗ്രാമപഞ്ചായത്തിലുള്ള കുളശ്ശേരി ബൂത്തിൽ പോളിംഗ് ഓഫീസറായിരുന്ന കെ സരസ്വതിയെയാണ് അന്വേഷണവിധേയമായി സസ്പെൻഡ് ചെയ്തത്. കൊല്ലം മുഖത്തല സ്വദേശിയാണ് സരസ്വതി.
കൊല്ലം ജില്ലയുടെ ചുമതലയുള്ള തെരഞ്ഞെടുപ്പ് ഉദ്യോഗസ്ഥന്‍റെ റിപ്പോർട്ടിന്‍റെ അടിസ്ഥാനത്തിലാണ് നടപടി.
സി.പി.എമ്മിന്‍റെ ചിഹ്നം ആലേഖനം ചെയ്ത മാസ്കാണ് ഇവര്‍ ധരിച്ചത്. മുഖത്തല ബ്ലോക്ക് കൊറ്റങ്കര പഞ്ചായത്തിലെ വേലങ്കോണം ജോണ്‍സ് കശുവണ്ടി ഫാക്ടറിയിലെ ഒന്നാം നമ്ബര്‍ ബൂത്തിലായിരുന്നു സംഭവം.
പോളിംഗ് ബൂത്തിലെ ചുമതലയുണ്ടായിട്ടും, രാഷ്ട്രീയപാർട്ടിയുടെ ചിഹ്നം ധരിച്ച് വന്നതിൽ വീഴ്ച പറ്റിയെന്നാണ് തെരഞ്ഞെടുപ്പ് ഉദ്യോഗസ്ഥന്‍റെ കണ്ടെത്തൽ.
ഇവര്‍ മാസ്ക് ധരിച്ച് ഡ്യൂട്ടി ചെയ്യുന്ന ചിത്രങ്ങള്‍ സമൂഹമാധ്യമങ്ങളില്‍ വൈറലായിരുന്നു.
