ഗല്‍വാന്‍ താഴ്‌വര ചൈനയ്ക്ക് നല്‍കിയോ?കേന്ദ്രത്തിനെതിരെ ശിവസേന
India

ഗല്‍വാന്‍ താഴ്‌വര ചൈനയ്ക്ക് നല്‍കിയോ?കേന്ദ്രത്തിനെതിരെ ശിവസേന

ഇന്ത്യ-ചൈന അതിര്‍ത്തി തര്‍ക്കത്തില്‍ കേന്ദ്രത്തിന്‍റെ നിലപാട് അസ്വീകാര്യമാണെന്ന് ശിവസേന നേതാവ് പ്രിയങ്ക ചതുര്‍വേദി

News Desk

News Desk

ന്യൂ ഡല്‍ഹി: ഇന്ത്യ-ചൈനാ സംഘര്‍ഷത്തില്‍ കേന്ദ്രസര്‍ക്കാര്‍ സ്വീകരിക്കുന്ന സമീപനത്തിനെതിരെ കടുത്ത വിമര്‍ശനമാണ് രാജ്യത്തിന്‍റെ വിവിധ കോണുകളില്‍ നിന്ന് ഉയര്‍ന്നുകൊണ്ടിരിക്കുന്നത്. കോണ്‍ഗ്രസ് നേതാവ് രാഹുല്‍ ഗാന്ധിക്ക് പിന്നാലെ കേന്ദ്രത്തെ വിമര്‍ശിച്ച് ശിവസേനയും രംഗത്തെത്തിയിരിക്കുകയാണിപ്പോള്‍.

അതിര്‍ത്തിയില്‍ നടന്ന സംഘര്‍ഷത്തില്‍ ഇരുപത് ഇന്ത്യന്‍ സൈനികര്‍ കൊല്ലപ്പെട്ടിട്ടും അതിര്‍ത്തിയില്‍ ചൈന കടന്നുകയറിയിട്ടില്ലെന്നും ഇന്ത്യയുടെ ഒരു സൈനിക പോസ്റ്റില്‍ പോലും അധീശത്വം സ്ഥാപിച്ചിട്ടില്ലെന്നുമാണ് മോദി കഴിഞ്ഞ ദിവസം പറഞ്ഞത്.

ഒരു ഭാഗത്ത് ഇന്ത്യന്‍ പ്രദേശങ്ങള്‍ ചൈനയ്ക്ക് വിട്ട് നല്‍കിയില്ലെന്ന് പ്രധാനമന്ത്രി പറയുകയും മറുഭാഗത്ത് ഗല്‍വാന്‍ താഴ് വാരം തങ്ങളുടേതാണെന്ന് ചൈന അവകാശപ്പെടുകയും ചെയ്യുന്നത് അസ്വീകാര്യമാണെന്നും ഇക്കാര്യത്തില്‍ കൂടുതല്‍ വ്യക്തത വരുത്തണമെന്നും ശിവസേന നേതാവ് പ്രിയങ്കാ ചതുര്‍വേദി പറഞ്ഞു.

"നമ്മള്‍ ഗല്‍വാന്‍ താഴ്‌വര വിട്ടുകൊടുത്തിട്ടുണ്ടോ, അതോ ചൈനീസ് സൈന്യത്തെ അവിടെ നിന്ന് പുറത്താക്കിയോ? രാജ്യത്തിന് അതറിയണം,”അവര്‍ ട്വിറ്ററില്‍ കുറിച്ചു.

നേരത്തെ കോണ്‍ഗ്രസ് നേതാവ് രാഹുല്‍ ഗാന്ധിയും മോദിക്കെതിരെ വിമര്‍ശനവുമായി എത്തിയിരുന്നു. ഇന്ത്യയില്‍ ചൈനീസ് പട്ടാളം കടന്നു കയറിയിട്ടില്ലെങ്കില്‍ ചൈനയുടെ ഭൂമിയില്‍ ഇന്ത്യന്‍ പട്ടാളക്കാര്‍ എങ്ങനെ കൊല്ലപ്പെട്ടുവെന്നായിരുന്നു രാഹുലിന്റെ ചോദ്യം. പ്രധാനമന്ത്രി ഇന്ത്യന്‍ അതിര്‍ത്തി ചൈനയുടെ ആക്രമണത്തിന് മുന്നില്‍ അടിയറവ് വെച്ചെന്നും രാഹുല്‍ പറഞ്ഞിരുന്നു.

Anweshanam
www.anweshanam.com