മഹാരാഷ്​ട്രയിലെ ആരാധനാലയങ്ങൾ തുറന്നു

വിഗ്രഹം, വിശുദ്ധ ഗ്രന്ഥങ്ങൾ തുടങ്ങിയവ തൊടാൻ അനുവദിക്കില്ല
മഹാരാഷ്​ട്രയിലെ ആരാധനാലയങ്ങൾ തുറന്നു

മുംബൈ: കോവിഡ് നിയന്ത്രണ വിധേയമായതോടെ മഹാരാഷ്​ട്രയിലെ ആരാധനാലയങ്ങൾ തുറന്നു. കോവിഡ്​ 19നെ തുടർന്ന്​ പ്രഖ്യാപിച്ച ലോക്​ഡൗണിനെ തുടർന്ന്​ അടച്ചിട്ട ആരാധനാലയങ്ങളാണ് തുറന്നത്. എട്ടുമാസത്തോളമാണ് ആരാധനാലയങ്ങൾ അടഞ്ഞ് കിടന്നത്. ശനിയാഴ്​ച ആരാധനാലയങ്ങൾ തുറക്കുന്ന വിവരം മഹാരാഷ്​ട്ര മുഖ്യമന്ത്രി ഉദ്ദവ്​ താക്കറെ അറിയിച്ചിരുന്നു.

ഞായറാഴ്​ച രാത്രി തുറന്ന ആരാധനാലയങ്ങളും പരിസരവുമെല്ലാം അണുവിമുക്തമാക്കി. തുടർന്ന്​ തിങ്കളാഴ്​ച വെളുപ്പിന്​ ഭക്തർക്കായി തുറന്നുനൽകുകയായിരുന്നു. ഷിർദ്ദി സായ്​ ബാബ ക്ഷേ​ത്രം, മഹിം ദർഗ, മുംബൈയിലെ സിദ്ധിവിനായക്​ ക്ഷേത്രം തുടങ്ങിയ പ്രശസ്​ത ആരാധനാലയങ്ങളും തുറന്നു.

കോവിഡ്​ മാനദണ്ഡങ്ങൾ പാലിച്ചുമാത്രമേ ആരാധന അനുവദിക്കൂ. വിഗ്രഹം, വിശുദ്ധ ഗ്രന്ഥങ്ങൾ തുടങ്ങിയവ തൊടാൻ അനുവദിക്കില്ല. സംഗീതം ആലപിക്കാനും മറ്റും അനുമതി നൽകില്ല. മിക്കയിടങ്ങളിലും ഓൺലൈനായി ബുക്ക്​ ചെയ്​തവരെ മാത്രമേ പ്രവേശനത്തിന്​ അനുവദിക്കൂ.

അതേസമയം കണ്ടെയ്​ൻമെൻറ്​ സോണുകളിലെ ആരാധനാലയങ്ങൾ തുറക്കാൻ അനുമതി നൽകില്ല. രോഗലക്ഷണമുള്ളവരെ ക്ഷേത്രത്തിനകത്ത്​ പ്രവേശിപ്പിക്കില്ല. മാസ്​ക്​ കൃത്യമായി ധരിക്കുകയും സാമൂഹിക അകലം പാലിക്കുകയും വേണം. ശരീര ഊഷ്​മാവ്​ പരിശോധിച്ചതിന്​ ശേഷമേ പ്രവേശനം അനുവദിക്കൂ.

Related Stories

Anweshanam
www.anweshanam.com