ഇന്ത്യ-യു.കെ വിമാന സര്‍വിസ്​ ജനുവരി എട്ട് മുതല്‍ പുനരാരംഭിക്കും

ജനുവരി 23 വരെ ആഴ്ചയില്‍ 15 വിമാനം മാത്രമേ ഉണ്ടാകൂ
ഇന്ത്യ-യു.കെ വിമാന സര്‍വിസ്​ ജനുവരി എട്ട് മുതല്‍ പുനരാരംഭിക്കും

ന്യൂഡല്‍ഹി: ജനതിക മാറ്റം വന്ന കോവിഡ് ബ്രിട്ടണില്‍ കണ്ടെത്തിയതിനെ തുടര്‍ന്ന് നിര്‍ത്തിവെച്ച ഇന്ത്യയില്‍ നിന്ന് യു.കെയിലേക്കും തിരിച്ചുമുളള വിമാന സര്‍വീസ് ജനുവരി എട്ട് മുതല്‍ പുനരാരംഭിക്കും.

ഡിസംബര്‍ അവസാനവാരത്തോടെയാണ് ഇന്ത്യ-യു.കെ. വിമാന സര്‍വീസ് താത്കാലികമായി റദ്ദാക്കിയത്. ജനുവരി എട്ടോടെ യു.കെ.യിലേക്കുള്ളതും തിരിച്ചുമുള്ള സര്‍വീസുകള്‍ പുനരാരംഭിക്കുമെന്ന് കേന്ദ്ര വ്യോമയാന മന്ത്രി ഹര്‍ദീപ് സിങ് പുരി അറിയിച്ചു.

അതേസമയം, ജനുവരി 23 വരെ ആഴ്ചയില്‍ 15 വിമാനം മാത്രമേ ഉണ്ടാകൂ. ഡല്‍ഹി, മുംബൈ, ബംഗളൂരു, ഹൈദരാബാദ്​ എന്നിവിടങ്ങളില്‍നിന്നാകും വിമാന സര്‍വിസ്​. ആദ്യം ഡിസംബര്‍ 23 മുതല്‍ 31 വരെയാണ്​ വിമാന സര്‍വിസ്​ വിലക്കിയത്​. പിന്നീട്​ ജനുവരി ഏഴ്​ വരെ നീട്ടുകയായിരുന്നു.

കൊറോണ വൈറസിന്‍റെ ജനിതകമാറ്റം വന്ന വകഭേദം റിപ്പോര്‍ട്ട് ചെയ്തതിന് ശേഷം യു.കെയില്‍നിന്ന് ഇന്ത്യയിലെത്തിയത് 33,000 യാത്രക്കാരാണ്​. 70 ശതമാനം വ്യാപനശേഷി കൂടിയ വൈറസാണ് യു.കെയില്‍ കണ്ടെത്തിയത്. തുടര്‍ന്ന്​ ഇന്ത്യയെ കൂടാതെ നിരവധി രാജ്യങ്ങളും വിമാന സര്‍വിസ്​ വിലക്കുകയായിരുന്നു.

Related Stories

Anweshanam അന്വേഷണം
www.anweshanam.com