കോവിഡ് മാനദണ്ഡങ്ങള്‍ പാലിച്ചില്ല; ബിജെപി നേതാവിനെതിരെ കേസ്

ശിവരാജ് സിംഗ് ചൗഹാന്റെ റോഡ് ഷോയില്‍ പങ്കെടുത്ത നേതാവിനെതിരെയാണ് എഫ്ഐആര്‍ രജിസ്റ്റര്‍ ചെയ്തിരിക്കുന്നത്.
കോവിഡ് മാനദണ്ഡങ്ങള്‍ പാലിച്ചില്ല; ബിജെപി നേതാവിനെതിരെ കേസ്

ഇന്‍ഡോര്‍: രാജ്യത്ത് ഏര്‍പ്പെടുത്തിയിരിക്കുന്ന കോവിഡ് നിയന്ത്രണങ്ങള്‍ ലംഘിച്ചതിന്റെ പേരില്‍ ബിജെപി നേതാവിനെതിരെ കേസ്. മധ്യപ്രദേശിലെ ബിജെപി നേതാവായ ദിനേഷ് ഭാവ്‌സറിനെതിരെയാണ് എഫ്ഐആര്‍ രജിസ്റ്റര്‍ ചെയ്ത് കേസെടുത്തിരിക്കുന്നത്- എഎന്‍ഐ റിപ്പോര്‍ട്ട്.

കോവിഡ് മാനദണ്ഡങ്ങള്‍ പാലിക്കാതെ കഴിഞ്ഞ ദിവസം സാന്‍വര്‍ തെഹ്‌സിലില്‍ വെച്ച് നടന്ന പരിപാടിയില്‍ ഇദ്ദേഹം പങ്കെടുത്തുവെന്നാണ് കേസ്. മുഖ്യമന്ത്രി ശിവരാജ് സിംഗ് ചൗഹാന്റെ റോഡ് ഷോയ്ക്കിടെയായിരുന്നു കോവിഡ് നിയന്ത്രണങ്ങള്‍ പാലിക്കാതെ ഇദ്ദേഹം പ്രത്യക്ഷപ്പെട്ടതെന്ന് പൊലീസ് പറഞ്ഞു.

റോഡ് ഷോയില്‍ അഞ്ച് വാഹനങ്ങള്‍ക്ക് മാത്രമാണ് പൊലീസ് അനുമതി നല്‍കിയിരുന്നത്. എന്നാല്‍ ഇത് ലംഘിച്ച് 20-25 വാഹനങ്ങളുമായി റോഡിലിറങ്ങിയെന്നാണ് കേസ്. അണികള്‍ തമ്മില്‍ സാമൂഹിക അകലം പാലിച്ചിരുന്നില്ലെന്നും ഭൂരിഭാഗം പേരും മാസ്‌കുകള്‍ ധരിക്കാതെയാണ് റാലിയില്‍ പങ്കെടുത്തതെന്നും പൊലീസ് പറഞ്ഞു. ദിനേഷ് ഭാവ്‌സറിനെതിരെ അന്വേഷണം ആരംഭിച്ചിട്ടുണ്ട്.

Related Stories

Anweshanam
www.anweshanam.com