തിരുവനന്തപുരം: കോവിഡ് പ്രതിരോധ പ്രവര്ത്തനങ്ങളിലൂടെ കൈവരിച്ച യശസിന് കളങ്കം വരുന്ന ചില കാര്യങ്ങളാണ് അടുത്തിടെ ഉണ്ടാകുന്നതെന്ന് മുഖ്യമന്ത്രി പിണറായി വിജയന്. രോഗികള് ശത്രുക്കളല്ല, രോഗമാണ് ശത്രു. ഇതൊരു കാരണവശാലും മറക്കരുതെന്നും മുഖ്യമന്ത്രി തിരുവനന്തപുരത്ത് വാര്ത്താസമ്മേളനത്തില് പറഞ്ഞു.
അന്യദേശങ്ങളില് നിന്നും കഷ്ടപ്പാടുകള് താണ്ടി കേരളത്തിലെത്തിയ സഹോദരങ്ങളില് ചിലര് നേരിടേണ്ടി വന്ന ചില ദുരനുഭവങ്ങള് കേള്ക്കാനിടയായി. ക്വാറന്റൈനില് കഴിയുന്നവരെ ഒറ്റപ്പെടുത്തുക, ഊരുവിലക്ക് പോലെ അകറ്റി നിര്ത്തുക, ചികിത്സ കഴിഞ്ഞവര്ക്ക് വീട്ടില് പ്രവേശനം നിഷേധിക്കുക പോലുള്ള സംഭവങ്ങളുണ്ടായതായി മുഖ്യമന്ത്രി ചൂണ്ടിക്കാട്ടി.
കോട്ടയത്ത് ബാഗ്ലൂരില്നിന്നെത്തി ക്വാറന്റീന് പൂര്ത്തിയാക്കിയ യുവതിയും മക്കളും വീട്ടില് കയറാനാകാതെ എട്ട് മണിക്കൂറോളം കഴിയേണ്ടിവന്നു. സ്വന്തം വീട്ടുകാരും ഭര്തൃവീട്ടുകാരും ഇവരെ സ്വീകരിക്കാന് തയ്യാറായില്ല. ഇത്തരം കാര്യങ്ങള് നമ്മെ എവിടെയാണ് എത്തിക്കുക എന്ന് ആലോചിക്കണം. ക്വാറന്റീനില് കഴിഞ്ഞതിനു ശേഷം മറ്റപകടങ്ങളില്ലെന്ന് ബോധ്യപ്പെട്ടിട്ടും അവരെ അകറ്റിനിര്ത്തുകയാണ്. രോഗബാധിതരെപ്പോലും അകറ്റിനിര്ത്തുകയല്ല വേണ്ടത്, സുരക്ഷാ മുന്കരുതലുകള് എടുത്തുകൊണ്ട് സംരക്ഷിക്കുകയാണ് വേണ്ടതെന്നും മുഖ്യമന്ത്രി പറഞ്ഞു.
സാധാരണ നിലയ്ക്ക് ക്വാറന്റൈന് പൂര്ത്തിയാക്കിയാല് മറ്റ് അപകടങ്ങളില്ലെന്ന് വ്യക്തമായവരെ അകറ്റി നിര്ത്തരുത്. അവരെ ശാരീരികാകലം പാലിച്ച് നല്ല രീതിയില് സംരക്ഷിക്കണം. റൂം ക്വാറന്റീന് ആണ് അവര്ക്ക് നിര്ദേശിച്ചത്. ഒരേ വീട്ടില് അങ്ങനെ നിരവധിപ്പേര് കഴിയുകയല്ലേ? ഒറ്റപ്പെട്ട ഇത്തരം ചില മനോഭാവങ്ങള് നമ്മുടെ സമൂഹത്തിന്റെ പൊതുനിലയ്ക്ക് അപകീര്ത്തികരമാണ്.
വിദേശങ്ങളില് നിന്ന് വരുന്നവരെ സ്വീകരിക്കുകയും ആവശ്യമായ സൗകര്യങ്ങള് നല്കുകയുമാണ് നമ്മുടെ നാടിന്റെ ഉത്തരവാദിത്തം. അതിന് പകരം അവരെ വീട്ടില് കയറ്റാതെ ആട്ടിയോടിക്കുന്ന നടപടികള് മനുഷ്യര്ക്ക് ചേര്ന്നതല്ലെന്നും മുഖ്യമന്ത്രി കൂട്ടിച്ചേര്ത്തു.
പതിനാല് ജില്ലകളിലും രോഗബാധിതര് വര്ധിച്ചതായി മുഖ്യമന്ത്രി ചൂണ്ടിക്കാട്ടി. നഗരങ്ങളിലും ഗ്രാമങ്ങളിലും കോവിഡ് ബാധിതരുണ്ട്. തിരുവനന്തപുരം, എറണാകുളം നഗരങ്ങളിലും മലപ്പുറത്തെ പൊന്നാനി താലൂക്കിലും ഗുരുതരമായ സാഹചര്യമാണ് നിലനില്ക്കുന്നത്. നമ്മുടെ ജാഗ്രത എന്നത്തേക്കാളും കൂടുതല് വേണമെന്നാണ് ഈ സാഹചര്യം സൂചിപ്പിക്കുന്നത്. എല്ലാവരും ഒത്തൊരുമിച്ചു പോരാടണം. അതിനാലാണ് ലോകത്തിനു തന്നെ മാതൃകയായി ഈ മഹാമാരിയെ പിടിച്ചുകെട്ടാനായതെന്നും മുഖ്യമന്ത്രി വാര്ത്താ സമ്മേളനത്തില് പറഞ്ഞു.
സംസ്ഥാനത്ത് ഇന്ന് 211 പേര്ക്കാണ് രോഗം സ്ഥിരീകരിച്ചത്. 201 പേര് രോഗമുക്തരായി. രോഗം സ്ഥിരീകരിച്ചവരില് 138 പേര് വിദേശത്ത് നിന്നും 39 പേര് മറ്റു സംസ്ഥാനങ്ങളില് നിന്നും വന്നവരാണ്. 27 പേര്ക്ക് സമ്ബര്ക്കത്തിലൂടെ രോഗം പിടിപെട്ടത് ആശങ്കപ്പെടുത്തുന്നു.
Comments