കോവിഡില്‍ കൂപ്പു കുത്തി രാജ്യത്തിന്‍റെ സാമ്പത്തിക വളര്‍ച്ച
business

കോവിഡില്‍ കൂപ്പു കുത്തി രാജ്യത്തിന്‍റെ സാമ്പത്തിക വളര്‍ച്ച

മൊത്ത ആഭ്യന്തര ഉത്പാദനത്തില്‍ 6.4 ശതമാനം ഇടിവുണ്ടായതായും ധനമന്ത്രാലയം അറിയിച്ചു

By News Desk

Published on :

ന്യൂ ഡല്‍ഹി: ഇന്ത്യയുടെ സാമ്പത്തിക വളര്‍ച്ച 4.5 ശതമാനത്തിലേക്ക് താഴുമെന്ന് ധനകാര്യമന്ത്രാലയം. കോവിഡ്​ ​ബാധമൂലമുണ്ടായ പ്രതിസന്ധിയാണ്​ നടപ്പ് സാമ്പത്തിക വര്‍ഷത്തില്‍ രാജ്യത്തിന്​ തിരിച്ചടിയായത്. മൊത്ത ആഭ്യന്തര ഉത്പാദനത്തില്‍ 6.4 ശതമാനം ഇടിവുണ്ടായതായും ധനമന്ത്രാലയം പുറത്തു വിട്ട റിപ്പോര്‍ട്ടില്‍ പറയുന്നു.

കോവിഡ് 19 മഹാമാരി പൊട്ടിപ്പുറപ്പെട്ടതിന് പിന്നാലെ ആഗോള സാമ്പത്തിക വളർച്ചാ നിരക്ക്​ 4.9 ശതമാനമായിരിക്കുമെന്നും, ഇത് ലോക സാമ്പത്തിക ഔട്ട്​ലുക്ക്​ പ്രവചനത്തേക്കാളും 1.9 ശതമാനം കുറവാണെന്നും അന്താരാഷ്​ട്ര നാണയ നിധി(ഐ.എം.എഫ്​) നേരത്തെ വ്യക്തമാക്കിയതാണ്. ചരിത്രത്തിലാദ്യമായാണ് ആഗോള സാമ്പത്തിക ലോകം ഇത്തരമൊരു തളര്‍ച്ച നേരിടുന്നത്.

ദേശീയ സ്റ്റാറ്റിസ്റ്റിക്കൽ ഓഫീസ് പുറത്തിറക്കിയ കണക്കുകള്‍ പ്രകാരം 2019-20 വര്‍ഷത്തില്‍ ഇന്ത്യയുടെ യഥാർത്ഥ ജിഡിപി വളർച്ചാ നിരക്ക് 4.2 ശതമാനമായിരുന്നു. സാമ്പത്തിക പ്രവർത്തനങ്ങളിലുണ്ടായ അനിശ്ചിതത്വമാണ് 2020-21 സാമ്പത്തിക വർഷത്തിന്റെ ആദ്യ രണ്ട് മാസങ്ങളിൽ രാജ്യത്തിന്‍റെ വരുമാനം ഇടിയാന്‍ കാരണമായത്. 1961ന്​ ശേഷമുള്ള ഏറ്റവും കുറഞ്ഞ നിരക്കിലേക്കാവും ഇന്ത്യൻ സമ്പദ്​വ്യവസ്ഥ കൂപ്പുകുത്തുകയെന്നാണ് സാമ്പത്തിക വിദഗ്ദരുടെ വിലയിരുത്തല്‍.

Anweshanam
www.anweshanam.com