ജാഗ്വാർ ഇന്ത്യയിലെ ഇലക്ട്രിക്ക് വാഹന സെഗ്മെന്റിലേക്ക് കാലെടുത്തുവയ്ക്കാൻ ഒരുങ്ങുന്നു

100 കിലോവാട്ട് റാപിഡ് ചാർജർ ഉപയോഗിച്ചാൽ ബാറ്ററിയുടെ 80 ശതമാനം ചാർജ് ചെയ്യാൻ 45 മിനിറ്റ് മതി. 7 കിലോവാട്ട് എസി വാൾ ബോക്സ് ഉപയോഗിച്ച് ചാർജ് ചെയ്യുമ്പോൾ 10 മണിക്കൂർ ആണ് ചാർജിങ് സമയം.
ജാഗ്വാർ  ഇന്ത്യയിലെ ഇലക്ട്രിക്ക് വാഹന സെഗ്മെന്റിലേക്ക് കാലെടുത്തുവയ്ക്കാൻ ഒരുങ്ങുന്നു

ടാറ്റ മോട്ടോഴ്സിന് കീഴിൽ പ്രവർത്തിക്കുന്ന ബ്രിട്ടീഷ് ആഡംബര കാർ നിർമാതാക്കളായ ജാഗ്വാർ ആണ് പുതുതായി ഇന്ത്യയിലെ ഇലക്ട്രിക്ക് വാഹന സെഗ്മെന്റിലേക്ക് കാലെടുത്തുവയ്ക്കാൻ ഒരുങ്ങുന്നത് . ബ്രാൻഡിന്റെ പെർഫോമൻസ് ഇലക്ട്രിക്ക് എസ്‌യുവിയായ ഐ-പെയ്സ് അടുത്ത മാസം 9-ന് ലോഞ്ച് ചെയ്താണ് ജാഗ്വാർ രാജ്യത്തെ ഇലക്ട്രിക്ക് വാഹന വിപണിയിലേക്കിറങ്ങുന്നത്.

ജനുവരി ആദ്യ വാരം തന്നെ മുംബൈയിലെ ജവഹർലാൽ നെഹ്‌റു പോർട്ട് ട്രസ്റ്റിൽ ഇറക്കുമതി ചെയ്ത ആദ്യ യൂണിറ്റ് ഐ-പെയ്‌സിന്റെ ചിത്രങ്ങൾ ജാഗ്വർ പുറത്തുവിട്ടിരുന്നു. രാജ്യത്തെ ടെസ്റ്റിംഗിനും ലോഞ്ചിന് മുന്നോടിയായുള്ള വാലിഡേഷനുമായാണ് ആദ്യ യൂണിറ്റ് എത്തിയത്. കഴിഞ്ഞ വർഷം നവംബറിൽ തന്നെ ഐ-പെയ്സ് എസ്‌യുവിയുടെ ബുക്കിങ് ജാഗ്വർ ആരംഭിച്ചിരുന്നു.

S, SE, HSE എന്നീ മൂന്ന് പതിപ്പുകളിൽ ഇന്ത്യയിൽ വില്പനക്കെത്തുന്ന ഐ-പെയ്സ്, EV400 പവർട്രെയിൻ ഓപ്ഷനിലാണ് ഇന്ത്യയിലെത്തുക.മുൻപിലേക്ക് ഒഴുകിയിറങ്ങുന്ന ബോണറ്റ്, സ്റ്റൈലിഷ് ആയ എൽഇഡി ഹെഡ്‍ലാംപ്, ഹണികോംപ് പാറ്റേർണിലുള്ള ഗ്രിൽ, വീതിയേറിയ എയർഡാം, 19-ഇഞ്ച് ഡയമണ്ട്-കട്ട് അലോയ് വീലുകൾ എന്നിവയാണ് ഐ-പെയ്‌സിന്റെ എക്‌സ്റ്റീരിയറിലെ സവിശേഷതകൾ. 4682 മില്ലീമീറ്റർ നീളവും, 2011 മില്ലീമീറ്റർ വീതിയും, 1566 മില്ലീമീറ്റർ ഉയരവുമുള്ള ഐ-പെയ്‌സിന്‌ 174 മില്ലീമീറ്റർ ഗ്രൗണ്ട് ക്ലിയറൻസും 2990 മില്ലിമീറ്റർ വീൽ ബേസുമുണ്ട്.

8 രീതിയിൽ ക്രമീകരിക്കാവുന്ന സെമി പവേർഡ് ലക്സ്റ്റെക് സ്പോർട്ട് സീറ്റുകൾ, 380W മെറിഡിയൻ സൗണ്ട് സിസ്റ്റം, ഇന്ററാക്ടീവ് ഡ്രൈവർ ഡിസ്പ്ലേ, 3ഡി സറൗണ്ട് ക്യാമറ, ഡ്രൈവർ കണ്ടീഷൻ മോണിറ്റർ, ആനിമേറ്റഡ് ഡയറക്ഷണൽ ഇൻഡിക്കേറ്ററുകൾ എന്നിവയാണ് ഐ-പെയ്‌സിലെ ഇന്റീരിയർ ആകർഷണങ്ങൾ. ഇത് കൂടാതെ, 825W മെറിഡിയൻ 3ഡി സറൗണ്ട് സൗണ്ട് സിസ്റ്റം, ഹെഡ്-അപ്പ് ഡിസ്പ്ലേ, അഡാപ്റ്റീവ് ക്രൂയിസ് കൺട്രോൾ എന്നിവയും ഐ-പെയ്സിലുണ്ടാവും.

90kWh ലിഥിയം-അയോൺ ബാറ്ററിയിൽ നിന്നും ഊർജമെടുത്ത് പ്രവർത്തിക്കുന്ന ഇരട്ട ഇലക്ട്രിക്ക് മോട്ടോറുകളാണ് ജാഗ്വർ ഐ-പെയ്‌സിൽ. 394 ബിഎച്ച്പി പവറും 696 എൻഎം ടോർക്കും ഉത്പാദിപ്പിക്കുന്ന ഈ എൻജിൻ നാല് വീലുകളിലേക്കും പവർ എത്തിക്കുന്നു. പെർഫോമൻസ് എസ്‌യുവിയായ ഐ-പെയ്‌സിന്‌ വെറും 4.8 സെക്കൻഡിനുള്ളിൽ മണിക്കൂറിൽ 100 കിലോമീറ്റർ കൈവരിക്കാൻ സാധിക്കും.

പൂർണമായും ചാർജ് ചെയ്താൽ 480 കിലോമീറ്ററിലധികം റേഞ്ച് ആണ് ഐ-പെയ്‌സിന്‌ ജാഗ്വർ അവകാശപ്പെടുന്നത്. 100 കിലോവാട്ട് റാപിഡ് ചാർജർ ഉപയോഗിച്ചാൽ ബാറ്ററിയുടെ 80 ശതമാനം ചാർജ് ചെയ്യാൻ 45 മിനിറ്റ് മതി. 7 കിലോവാട്ട് എസി വാൾ ബോക്സ് ഉപയോഗിച്ച് ചാർജ് ചെയ്യുമ്പോൾ 10 മണിക്കൂർ ആണ് ചാർജിങ് സമയം.

AD
No stories found.
Anweshanam അന്വേഷണം
www.anweshanam.com