Home
വാര്ഡന്റെ വീട് ക്വട്ടേഷന് സംഘം അടിച്ചുതകര്ത്തു
Category: Crime Published on Tuesday, 20 September 2011 11:36
മണ്ണഞ്ചേരി: ആലപ്പുഴ സബ് ജയില് വാര്ഡന്റെ വീട് ക്വട്ടേഷന് സംഘം അടിച്ചുതകര്ത്തു. മണ്ണഞ്ചേരി പഞ്ചായത്ത് 10ാം വാര്ഡ്
സ്വദേശി അക്കരോത്ത വെളി വിനോദ്കുമാര്, സഹോദരന് ബാബു എന്നിവരുടെ വീടുകള്ക്ക് നേരെയാണ് പുലര്ച്ചെ 2.45 ഓടെ ആക്രമണമുണ്ടായത്. മാരകായുധങ്ങളുമായി എത്തിയ എട്ടംഗസംഘം ആദ്യം വിനോദ്കുമാറിന്റെ വീടിനു നേര്ക്കാണ് ആക്രമണം അഴിഞ്ഞുവിട്ടത്. വീടിനുള്ളില് അതിക്രമിച്ചു കയറിയസംഘം വിനോദ് കുമാറിന്റെ ഭാര്യയ്ക്കു നേരെ വധഭീഷണി മുഴക്കി. ഈ സമയം വിനോദ്കുമാര് ജയില് ഡ്യൂട്ടിയിലായിരുന്നു. വീടിന്റെ കതകുകളും ജനാലകളും അടിച്ചുതകര്ത്ത സംഘം ടി.വിയും കസേരകളും നശിപ്പിച്ചു.
തുടര്ന്നാണ് ബാബുവിന്റെ വീടിനു നേരെ ആക്രമണമുണ്ടായത്. ശബ്ദം കേട്ട് നാട്ടുകാര് ഓടിയെത്തിയപ്പോഴേക്കും അക്രമിസംഘം രക്ഷപ്പെട്ടു. ഹോമിയോ ഡിപ്പാര്ട്ട്മെന്റ് ജീവനക്കാരനാണ് ബാബു. വീടിന്റെ വാതിലുകളും ജനാലകളും തകര്ത്ത സംഘം ടെലിഫോണ് കേബിളും പൈപ്പ്ലൈനുകളും തകര്ത്തു.
മയക്കുമരുന്നുകേസ് ശിക്ഷിക്കപ്പെട്ട് ജയിലില് കഴിയുന്ന ചില പ്രതികള്ക്ക് വഴിവിട്ട് സൗകര്യങ്ങള് ചെയ്തുകൊടുക്കാന് വിനോദ്കുമാര് തയ്യാറാകാത്തതാണ് ആക്രമണത്തിന് കാരണമെന്ന് കരുതുന്നു. ജയിലിനുള്ളില് മയക്കുമരുന്ന് ഉപയോഗിക്കാനുള്ള പ്രതികളുടെ നീക്കം വിനോദ്കുമാറും മറ്റു ചില ഉദ്യോഗസ്ഥരും തടഞ്ഞിരുന്നു. ഇതിന്റെ പ്രതികാരമാണ് അക്രമമെന്ന് പോലീസ് പറഞ്ഞു. മണ്ണഞ്ചേരി പോലീസ് സ്ഥലത്തെത്തി അന്വേഷണം ആരംഭിച്ചു.