ബെയ്ജീങ്: ടിബറ്റന്‍ ആത്മീയ നേതാവ് ദലൈലാമയുടെ ആരോപണങ്ങളില്‍ പുതുതായി ഒന്നുമില്ലെന്നു ചൈന. ദലൈലാമ വിഘടനവാദിയാണ്. ചൈനയെ പിളര്‍ത്താനും രാജ്യത്തെ വംശീയ ഐക്യം തകര്‍ക്കാനുമാണ് അദ്ദേഹം ശ്രമിക്കുന്നതെന്നു ചൈനീസ് വിദേശകാര്യ വക്താവ് കിങ് ഗാങ് പറഞ്ഞു. ടിബറ്റന്‍ പ്രവാസ സര്‍ക്കാരിനെ ലോകത്തെ ഒരു രാജ്യവും അംഗീകരിച്ചിട്ടില്ല. പ്രവാസ സര്‍ക്കാര്‍ ധര്‍മശാലയിലാണെന്നത് ഇന്ത്യയുമായുള്ള ചൈനയുടെ നയതന്ത്രബന്ധങ്ങളെ ബാധിക്കില്ലെന്നും കിങ് ഗാങ് അറിയിച്ചു.

തടവറയ്ക്കു സമാനമായ സാഹചര്യത്തിലാണു ടിബറ്റിലെ ബുദ്ധമത വിശ്വാസികള്‍ ജീവിക്കുന്നതെന്നായിരുന്നു ദലൈലാമ പ്രസ്താവന. ടിബറ്റില്‍ നിന്നു പലായനം ചെയ്തതിന്‍റെ 51-ാം വാര്‍ഷികത്തിലാണു ദലൈലാമ ഇങ്ങനെ പറഞ്ഞത്.
സിങ്ജിയാങ് പ്രവിശ്യയില്‍ ഉള്‍ഗര്‍ വംശജര്‍ സ്വയംഭരണാവകാശത്തിനു വേണ്ടി നടത്തുന്ന പോരാട്ടങ്ങളെ ദലൈലാമ പിന്തുണച്ചു. സിങ്ജിയാങ്ങിനെ കിഴക്കന്‍ തുര്‍ക്കിസ്ഥാന്‍ എന്ന് അദ്ദേഹം വിശേഷിപ്പിച്ചു.

സാന്റിയാഗോ: പുതിയ പ്രസിഡന്റിന്റെ സ്ഥാനാരോഹണ ചടങ്ങിനിടെ ചിലിയില്‍ 12 തവണ കനത്ത ഭൂചലനം അനുഭവപ്പെട്ടു. റിക്ടര്‍ സ്‌കെയിലില്‍ 4.9 മുതല്‍ 6.9 വരെ രേഖപ്പെടുത്തിയ ഭൂചലനങ്ങളില്‍ ആള്‍നാശമുണ്ടായതായി റിപ്പോര്‍ട്ടുകളില്ല.

ഭൂചലനത്തെതുടര്‍ന്ന് ചിലി നാവികസേന സുനാമി മുന്നറിയിപ്പ് പുറപ്പെടുവിച്ചു.

വാല്‍പരാസിയോയില്‍ പുതിയ പ്രസിഡന്റ് സെബാസ്റ്റ്യന്‍ പിനേരയുടെ സ്ഥാനാരോഹണചടങ്ങുകളുടെ ഉദ്ഘാടനം നട്കകുന്നതിനിടെയായിരുന്നു പുതിയ ഭൂകമ്പ പരമ്പര അനുഭവപ്പെട്ടത്. സ്‌പെയിനിയെ കിരീടാവകശായിയും ചടങ്ങില്‍ പങ്കെടുത്തിരുന്നു.

ഫെബ്രുവരി 27ന് ചിലിയില്‍ 8.8 രേഖപ്പെടുത്തിയ ഭൂചലനത്തെതുടര്‍ന്ന് നിരവധിയാളുകള്‍ മരിക്കുകയും കെട്ടിടങ്ങള്‍ക്ക് കേടുപാടുകള്‍ സംഭവിക്കുകയും ചെയ്തിരുന്നു. കഴിഞ ആഴ്ചകളില്‍ ഇവിടെ നിരവധി തുടര്‍ചലനങ്ങള്‍ രേഖപ്പെടുത്തിയിട്ടുണ്ട്.