ന്യൂഡല്‍ഹി: വനിതാ സംവരണ ബില്‍ മുഖ്യപ്രതിപക്ഷ പാര്‍ട്ടിയായ ബി.ജെ.പി.യിലും അഭിപ്രായഭിന്നത സൃഷ്ടിച്ചിരിക്കുകയാണ്.

ബില്ലിനെ പിന്തുണയ്ക്കുമെന്നാണ് പാര്‍ട്ടിയുടെ ഔദ്യോഗിക നിലപാടെങ്കിലും ചില മുതിര്‍ന്ന അംഗങ്ങള്‍ എതിര്‍പ്പുമായി രംഗത്തുവന്നിട്ടുണ്ട്. ഇതിനെ തുടര്‍ന്ന് ലോക്‌സഭയിലെ പ്രതിപക്ഷ നേതാവ് സുഷമ സ്വരാജ് പാര്‍ട്ടി അംഗങ്ങളുടെ യോഗം വിളിച്ചുചേര്‍ത്തിട്ടുണ്ട്. ബില്ലിന് അനുകൂലമായി വോട്ട് ചെയ്യണമെന്ന് ആവശ്യപ്പെട്ട് അംഗങ്ങള്‍ക്ക് വിപ്പ് നല്‍കുമെന്നും സുഷമ സ്വരാജ് അറിയിച്ചു.

യോഗി ആദിത്യനാഥ്, മുന്‍ കേന്ദ്രമന്ത്രി ഹുക്കുംദേവ് നാരായണ്‍ യാദവ്, ലോക്‌സഭയിലെ പാര്‍ട്ടിയുടെ ചീഫ് വിപ്പ് രമേഷ് ബയസ് എന്നിവരാണ് ബില്ലിനെതിരെ നിലകൊണ്ട പാര്‍ട്ടി എം.പി.മാര്‍. വിപ്പ് ലംഘിച്ച് ബില്ലിനെതിരെ വോട്ട് ചെയ്യുമെന്ന് ഇവരില്‍ ചിലര്‍ ഭീഷണി മുഴക്കിയിട്ടുമുണ്ട്. ഇതിനെ തുടര്‍ന്ന് രാജ്യസഭയിലെ പ്രതിപക്ഷ നേതാവ് അരുണ്‍ ജെയ്റ്റ്‌ലി, മുന്‍ ദേശീയ പ്രസിഡന്റ് രാജ്‌നാഥ് സിങ് എന്നിവര്‍ എം.പി.മാരും ചര്‍ച്ച നടത്തിവരികയാണ്. ലോക്‌സഭയില്‍ ബില്‍ പാസാകാന്‍ 116 അംഗങ്ങളുള്ള ബി.ജെ.പി.യുടെ പിന്തുണ സര്‍ക്കാരിന് അത്യന്താപേഷിതമാണ്.

അഫ്ഗാനിസ്ഥാന്‍റെ പുനരുദ്ധാരണ പ്രവര്‍ത്തനങ്ങളില്‍ നിന്നു ഭാഗികമായെങ്കിലും പിന്മാറാന്‍ ഇന്ത്യ ആലോചിക്കുന്നു. ഊര്‍ജ, റോഡ് പദ്ധതികളില്‍ ജോലി ചെയ്യുന്ന ഇന്ത്യക്കാരെ സുരക്ഷ മുന്‍നിര്‍ത്തി ഒരേ സ്ഥലത്തേക്കു മാറ്റിയേക്കുമെന്നും സര്‍ക്കാര്‍ വൃത്തങ്ങള്‍.
ഫെബ്രുവരി 26ന് ഇന്ത്യക്കാരെ ലക്ഷ്യമിട്ടു കാബൂളിലുണ്ടായ ആക്രമണത്തിന്‍റെ പശ്ചാത്തലത്തില്‍ ദേശീയ സുരക്ഷാ ഉപദേഷ്ടാവ് ശിവശങ്കര്‍ മേനോന്‍ കഴിഞ്ഞ ആഴ്ച അഫ്ഗാന്‍ സന്ദര്‍ശിച്ചിരുന്നു. അവിടത്തെ സ്ഥിതിഗതികള്‍ വിലയിരുത്തിയ ശേഷമാണ് പിന്മാറ്റം പരിഗണിച്ചു തുടങ്ങിയത്. കാബൂളിലെ എംബസി കൂടാതെ, ഹെരാത്ത്, കാന്ധഹാര്‍, മസാര്‍-ഇ-ഷെരീഫ് എന്നിവിടങ്ങളിലും ഇന്ത്യയ്ക്കു കോണ്‍സുലേറ്റുകളുണ്ട്. ഇവിടങ്ങളില്‍ സേവനമനുഷ്ഠിക്കുന്ന ഇന്ത്യക്കാരോടു നാട്ടിലേക്കു മടങ്ങാന്‍ നിര്‍ദേശിക്കുമെന്നും സൂചന. ഇന്ത്യന്‍ മെഡിക്കല്‍ മിഷന്‍ നേരത്തേ പ്രവര്‍ത്തനം നിര്‍ത്തിയിരുന്നു.
ഫെബ്രുവരി 26നുണ്ടായ ആക്രമണത്തില്‍ ആറ് ഇന്ത്യക്കാരാണു കൊല്ലപ്പെട്ടത്. 2008 ജൂലൈയിലും 2009 ഒക്റ്റോബറില്‍ പാക് ചാരസംഘടന ഐഎസ്ഐയുടെ പിന്തുണയോടെ താലിബാന്‍ ഭീകരര്‍ ഇന്ത്യന്‍ എംബസിക്കു നേരേ ആക്രമണം നടത്തിയിട്ടുണ്ട്. 2008ല്‍ ഒരു ഐഎഫ്എസ് ഉദ്യോഗസ്ഥന്‍ ഉള്‍പ്പെടെ നാല് ഇന്ത്യക്കാരും 2009ല്‍ നാല് ഐടിബിപി ജവാന്‍മാരും കൊല്ലപ്പെട്ടു.
ഇതിനിടെ, ഇറാന്‍ പ്രസിഡന്‍റ് മെഹ്മൂദ് അഹമ്മദി നെജാദ് ഇന്നലെ അഫ്ഗാന്‍ സന്ദര്‍ശനത്തിനെത്തിയിട്ടുണ്ട്. രാജ്യത്തെ ഇറേനിയന്‍ സ്വാധീനത്തില്‍ യുഎസ് പ്രതിരോധ സെക്രട്ടറി റോബര്‍ട്ട് ഗേറ്റ്സ് ആശങ്ക പ്രകടിപ്പിച്ചതിനു പിന്നാലെയാണു സന്ദര്‍ശനം.