തിരുവനന്തപുരം: രാജ്യസഭാ സീറ്റ്‌ വിഭജനം ചര്‍ച്ച ചെയ്യാന്‍ ചേര്‍ന്ന എല്‍ ഡി എഫ്‌ യോഗം തീരുമാനം ഉണ്ടാവാതെ പിരിഞ്ഞു. ഇന്നു രാവിലെ 11 ന്‌ വീണ്ടും എല്‍ ഡി എഫ്‌ യോഗം ചേരും. ഇന്നലെ രണ്ടു വട്ടം എല്‍ഡിഎഫ്‌ യോഗം ചേരുകയും സി പി എം നേതാക്കള്‍ ഘടകകക്ഷികളായ ആര്‍ എസ്‌ പി, കേരളാ കോണ്‍ഗ്രസ്‌(ജെ), ജനതാദള്‍ എസ്‌ എന്നിവയുമായി പ്രത്യേകം പ്രത്യകം ഉഭയകക്ഷി ചര്‍ച്ച നടത്തുകയുമുണ്ടായി. രണ്ടു സീറ്റും തങ്ങള്‍ തന്നെ എടുക്കുമെന്ന നിലപാടാണ്‌ സി പി എം സ്വീകരിച്ചത്‌. എന്നാല്‍ ഒരു സീറ്റ്‌ ലഭിക്കണമെന്ന ആവശ്യത്തില്‍ വിട്ടുവീഴ്‌ചയ്‌ക്കില്ലെന്ന്‌ ആര്‍ എസ്‌ പിയും ഉറച്ചുനിന്നു.എന്നാല്‍ രാജ്യസഭാ സീറ്റ്‌ വിഭജനത്തില്‍ കടുത്ത പ്രതിഷേധ നടപടികള്‍ സ്വീകരിക്കേണ്ടെന്ന്‌ ആര്‍ എസ്‌ പി തീരുമാനിച്ചതായി റിപ്പോര്‍ട്ടുണ്ട്‌. സീറ്റ്‌ ലഭിച്ചില്ലെങ്കില്‍ മന്ത്രിയെ പിന്‍വലിക്കുക, മുന്നണി വിടുക തുടങ്ങിയ തീരുമാനങ്ങള്‍ ഗുണം ചെയ്യില്ലെന്ന്‌ ആര്‍ എസ്‌ പി നേതൃത്വം വിലയിരുത്തിയതായാണ്‌ അറിയുന്നത്‌. രണ്ടു സീറ്റും സി പി എം എടുക്കുകയാണെങ്കില്‍ കടുത്ത പ്രതിഷേധം എല്‍ ഡി എഫ്‌ യോഗത്തില്‍ ഉന്നയിക്കുക മാത്രമാണ്‌ അവര്‍ ചെയ്യുക. രണ്ടു സീറ്റുകളും സി പി എം എടുക്കുന്നതില്‍ ആര്‍ എസ്‌ പി കടുത്ത എതിര്‍പ്പ്‌ പ്രകടിപ്പിച്ചുവെന്ന്‌ മുന്നണി കണ്‍വീനര്‍ വൈക്കം വിശ്വന്‍ തന്നെ വാര്‍ത്താ സമ്മേളനത്തില്‍ അറിയിക്കണമെന്ന്‌ ആവശ്യപ്പെടും. ഇതിന്‌ തയ്യാറായില്ലെങ്കില്‍ ആര്‍ എസ്‌ പി സ്വന്തം നിലക്ക്‌ പ്രത്യേക വാര്‍ത്താ സമ്മേളനം വിളിച്ച്‌ എതിര്‍പ്പ്‌ അറിയിക്കും. ഉടന്‍ ചേരുന്ന കേന്ദ്രകമ്മറ്റിയില്‍ വിഷയം അവതരിപ്പിക്കാനും ആര്‍ എസ്‌ പി തീരുമാനിച്ചു. എല്‍ ഡി എഫിന്റെ രാജ്യസഭാ സീറ്റ്‌ വിഭജനം ചര്‍ച്ച ചെയ്യുന്നതിന്‌ മുന്നണി യോഗം സി പി എം ആസ്ഥാനമായ എ കെ ജി സെന്ററിലാണ്‌ ചേരുന്നത്‌. സി പി എം തന്നെ രണ്ടു സീറ്റും ഏറ്റെടുക്കുമെന്നാണ്‌ ആര്‍ എസ്‌ പിയുടെ നീക്കത്തില്‍നിന്ന്‌ ഉറപ്പാകുന്നത്‌.

തിരുവനന്തപുരം: കഴിഞ്ഞ വര്‍ഷം ജനുവരി മുതല്‍ ഡിസംബര്‍ വരെയുള്ള കാലയളവില്‍ 4794 നിയമനങ്ങള്‍ പി എസ്‌ സി വഴി നടത്തിയിട്ടുണ്ടെന്നു ധനമന്ത്രി ഡോ. റ്റി എം തോമസ്‌ ഐസക്‌. നിയമസഭയില്‍ ഉപ ധനാഭ്യര്‍ഥന ചര്‍ച്ചക്കു മറുപടി പറയുകയായിരുന്നു മന്ത്രി. നിയമന നിരോധനം നിലനില്‍ക്കുന്നവെന്നു പറയുന്ന വേളയിലാണ്‌ ഈ നിയമനങ്ങള്‍ നടത്തിയത്‌. സംസ്ഥാനത്തിന്റെ റവന്യൂ വരുമാനം ഉറപ്പു വരുത്തിയിട്ടു മാത്രമെ റവന്യൂ ചെലവു വരുന്ന പുതിയ പദ്ധതികള്‍ നടപ്പാക്കുകയുള്ളൂവെന്നും മന്ത്രി വ്യക്തമാക്കി. അതുവരെ പുതിയ ചെലവുകള്‍ അനുവദിക്കില്ല. അധിക വിഭവ സമാഹരണം ഉദ്ദേശിച്ച രീതിയില്‍ നടന്നാല്‍ എല്ലാ പദ്ധതികള്‍ക്കും പണം നല്‍കാന്‍ കഴിയും. പാലക്കാട്‌ ജില്ലയിലെ മലമ്പുഴ ഡാമില്‍ നിന്നും മണലെടുക്കുന്നതിനുള്ള ടെണ്ടര്‍ നടപടികള്‍ പൂര്‍ത്തിയായിട്ടുണ്ട്‌. ഇതുമായി ബന്ധപ്പെട്ടു പരിസ്ഥിതി പഠനം നടത്തിയിട്ടുണ്ട്‌. എന്നാല്‍ കടലില്‍ നിന്നും മണലെടുക്കുന്ന പദ്ധതി അംഗീകരിക്കില്ല. പാരിസ്ഥിതിക പ്രശ്‌നങ്ങള്‍ വരുന്ന ഇത്തരം പദ്ധതികള്‍ അനുവദിക്കാനും കഴിയില്ല. കാര്‍ഷിക കടാശ്വാസം നല്‍കുന്നത്‌ കര്‍ഷകര്‍ക്കു നേരിട്ടു പണം നല്‍കിയല്ല. സാമ്പത്തിക സ്ഥാപനങ്ങളുമായാണു സര്‍ക്കാര്‍ ഇടപെടുന്നത്‌. ഓരോ സ്ഥാപനങ്ങളും നല്‍കിയ കടം തിരികെ നേരിട്ടു നല്‍കും. കിട്ടാതെ കിടക്കുന്ന കടം മൂന്നു തവണയായി നല്‍കും. ജനങ്ങള്‍ക്കു ഗുണകരമാകുന്ന പദ്ധതികളില്‍ നിന്നും സര്‍ക്കാര്‍ പിന്നോട്ടു പോകില്ലെന്നും മന്ത്രി സൂചിപ്പിച്ചു. കുടുംബശ്രീ വഴി നടപ്പാക്കുന്ന ഭവനശ്രീ പദ്ധതിക്കു ആവശ്യമായ പണം നല്‍കിയിട്ടുണ്ട്‌. 2009 ലെ തദ്ദേശ സ്ഥാപനങ്ങളുടെ പദ്ധതി 6519 കോടിയുടേതായിരുന്നു. ഇതു പുനരവലോകനം ചെയ്‌തപ്പോള്‍ 6113 കോടിയായി. ഈ സ്ഥിതിയിലാണു കാര്യങ്ങള്‍ മുന്നോട്ടു പോകുന്നതെങ്കില്‍ 2009 -2010 ലെ പദ്ധതി നൂറു ശതമാനം കഴിയും. കഴിഞ്ഞ വര്‍ഷം ഒരിക്കല്‍ പോലും വെയ്‌ല്‍സ്‌ ആന്റ്‌ മീല്‍സ്‌ മൈനസായിട്ടില്ലെന്നു മന്ത്രി പറഞ്ഞു. വിവിധ വകുപ്പുകളില്‍ നിന്നും 19 ധനാഭ്യര്‍ത്ഥനകളാണ്‌ വന്നത്‌. ചര്‍ച്ചകള്‍ക്കു ശേഷം ഉപ ധനാഭ്യര്‍ഥനകള്‍ പാസാക്കി.